:) ———-> -_-" December 31, 2007

السلام عليكم ورحمة الله وبركاته !
الحمد لله خلصت امتحانات الفاينل البارحه !
بس آخر امتحان مثل ما توقعت انه صعب و “فعلا” طلع صعب!
الله المستعان بس دعواتكم !
حاليا عندي اجازه اسبوعين بفصفصهم بكم لعبه خخخخخخ !
او في احتماليه اني اسافر :/
لو الود ودي جان رحت الكويت !!!!!
خلوني اكمل !
مثل ما قلت آخر امتحان كان هو الماركتنج
قبل الامتحان الله لا يوريكم كيف كانت حالتي !
إكتئاااااااااب !!
من العصر لين الفليل وانا مخلص 3 تشابرات بس !
من اصل 9 تشابترات !!!
ما كان في وقت مع اني مذاكرنهم قبل العيد بس ما ادري احس ان كل شي اتبخر :/
بس الحمد لله ! ههه وانا امتحن قاعد احسب الاغلاط ههههه !
بعد ما طلعت من الامتحان ، قلت طز في الامتحان خلني اروح اشتريلي شي استانس عليه بدل ما افكر واوسوس بالامتحان !
فرحت اخذت افضل كونسول للأون لاين !

——–
عاده سخيفه عندنا في دبي
———
كل سنه جديده الناس تتجمع عند برج العرب ، وما ادري ليش يعني ، تحس انهم اول مره
يشوفون العاب ناريه في حياتهم :/
طبعا هذا الشي يكون بمناسبة العام الجديد ، واليوم الكل متجمع عند برج العرب
يتجهزون حق الالعاب الناريه ، اتذكر السنه اللي فاتت او قبل سنتين رحت
وياريتني ما سرت ، سخافه…شي تافهه ، العاب ناريه وبعدين يعني؟
الله يعين اليوم لأن عند برج العرب تكون زحمه غير طبيعيه !!!!!
مثل ما قلت قبل سنه/سنتين لما رحت و “بالرغم ان برج العرب قريب مننا وايد” اخذنا تقريبا ساعه لين ما وصلنا البيت !!!!!
بس علشان هذا الشي! -__-”

مذاكره ناقصه ! December 23, 2007

السلام عليكم ورحمة الله وبركاته !
وكل عام وانتوا بخير ادري متأخر بس مشغول -_-

ماباقي شي عن الفاينل أول امتحان هو
Macro Economics
يوم الثلاثاء ببدأ واخلص بالاحد ان شاء الله ! وطبعا هالخمس ايام يعتبرون عندي كابوس !
خصوصا الماركتنج لأني متأكد ان الامتحان بيكون صعب مثل الميد تيرم :/

بس في مشكله وحده دايما معاي ومستحيل تروح عني !
مثلا اذا عندي امتحان وهو عباره عن تشابتر واحد ، آخر صفحتين مستحيل اذاكرهم عدل بس اقرأ !! ما اردي ليش او لو عندي تشابترين

بعد نفس الشي آخر صفحتين ما اذاكرهم بضمير ، ما ادري ليش مكا اكمل الشي ، انا دايما جذي الشي عندي ما اكمله 100%
والكمال لله طبعا ! بس هالشي بس انا اللي اعاني منه ؟؟؟

موقف ما انساه :p December 16, 2007

السلام عليكم ورحمة الله وبركاته !
البارحه وانا طالع ويا اربيعي ونسولف ، تذكرت موقف صار ايام الثنويه مممممممم من سنتين يعني خخخخ
المهم
وقت الفسحه في المدرسه ،كل الطلبه يتجمعون ويسوون مباريات الخ ، وانا وربعي نتمشى
عاد ونحنا نتمشى، شفت اربيعي سار بعييد ما ادري وين ، المهم انا لمحته ، واشوف شي يطير فوق

ههه اشوف كوره !! واسمع “بااااااق” هههههههه كيس “تشبس” في جيبه والصوت طلع منه خخخخ
وانا ميت من الضحك ! المهم بعدها بكم يوم وكعادتنا نتمشى انا وربعي ، اشوف كل ربعي وبسرعه بتنافرووون بدون ما انتبه انا و الف ويهي يمين

ما اشوف الا الكوره على راسي ما ادري على ويهي !!! حسيت ان مخي افتر وويهي استوى لقيمات من الضربه وكلهم يضحكووون “لول حتى الاساتذه كانوا يضحكون علي”

يوم لك ويوم عليك !

تم بحمد الله وعونه December 11, 2007

السلام عليكم ورحمة الله وبركاته !
تم بحمد الله وعونه ، الانتهاء من بحث الخطه التسويقيه لمادة التخصص
بعد تعب وهلاك صراحه ،لول قبل تسليم البحث بكم ساعه ، شكلي مثل المجنون
احاول اخلص كل شي بسرعه مع اعضاء القروب، واشكالنا فعلا خلاص تعبانين !
طالع الساعه ١ ونص الظهر تقريبا والساعه ١٠ في الليل وصلت البيت !

كان يوم متعب فعلا !
قدمنا البرزنتيشن ، بس احس انه لا تعليق ، حاولت اشرح كل شي في البروجكتو وبعد ما خلصنا التقديم ، استغربت ان الدكتور ما سأل ولا سؤال ، هل معناته انه ما عجبه او مافهم ؟ الله أعلم !
ودعواتكم لي!

الدراسه وماتسوي ! December 7, 2007

السلام عليكم ورحمة الله وبركاته !
لول احس ان المدونه مهجوره ومافيها احد خخخخخ
مشغول بالدراسه والله ، والحين يالس اسوي البروجكت وعليه ٣٠ درجه !
وبعد اسبوعين عندي امتحانات الفاينل ، بس دعواتكم وان شاء الله راجع بسوالف اكثر

وشكرا لكل المتابعين

في مثل هذا اليوم لكن قبل ٣٦ سنه ! December 2, 2007

قام الانتحاد في دولتنا الحبيبه بأسم “الامارات العربيه المتحده” في تاريخ ٢-ديسمبر-١٩٧١
وضمت كل من : ابوظبي، دبي، الشارقه،عجمان،ام القيوين، الفجيره ، ورأس الخيمه .
قام هذا الاتحاد بقائد لن ينساه احد ، الشيخ زايد بن سلطان آل نهيان رحمه الله .
واليوم اهل الامارات يحتفل بيومه الوطني ال36
في جميع انحاء الإمارات الحبيبه.
كل عام ووإنتي بخير يا اماراتي وجميع شعب الامارات (:

ملاحظه: ظلل الموضوع كامل علشان تقرأه بشكل صحيح !