شكرا للجميع. January 18, 2008

السلام عليكم ورحمة الله وبركاته

ماعندي شي أقوله بس حبيت اشكر الجميع على متابعته المستمره للمدونه ولو انها جدا بسيطه
وأتمنى انها تتطور اكثر وأكثر ، لكن اللي ابغي من القراء بعض الاقتراحات للمدونه، كيف اطورها ؟
شو نوعية المواضيع اللي تجذب القارئ؟ وشو العيوب اللي تشوفها في المدونه وتحتاج تعديل وتحسين.
أتمنى من الجميع المشاركه علشان احسن من مستوى المدونه.
(باب التعليقات مفتوح الآن للجميع)

مره ثانيه شكرا جزيلا للجميع عل المتابعه.

مطرررررررر ! January 15, 2008

السلام عليكم ورحمة الله وبكاته !
من البارحه بالليل لين الحين العصر والمطر مستمر في النزول !
طبعا الحمد لله عالرحمه ! عندي كلاس الساعه 4 ودبي كلها زحمه !!!

اتصلت فيهم قلت لهم دبي كلها زحمه كيف اوصل الجامعه !!!!
قالت لي اذا ما تقدر توصل عادي مافي تسجيل للحضور والكلاسات بتنعاد ! يس وناسه خخخخخخ
التوقعات تقول ان نفس الشي لين باجر المغرب + المدارس معطلين باجر بعد !!!

الله بيعطيك أجر! January 6, 2008

السلام عليكم ورحمة الله وبركاته !

ههههه من المواقف اللي صارت لي الفتره الاخيره او بالاصح ايام الامتحانات..

كنت قاعد امشي في الحوي او “الحوش” وانا امشي شفت حمود ولد اخويه عمره 6 تقريبا ..ههه سوالف هالانسان

شفته قاعد يلعب، ولاحظت انه فار”قاط” قرطاسه عالارض ، قلت له حمود لو سمحت شل القرطاسه وارميها في الزباله الله بيعطيك اجر”طبعا بكل ادب كلمته”

قال انزين ، عطيته ظهري ومشيت شوي والا اسمعه يقول حق الخدامه ، شلي القرطاس وارميه في الزباله ترا الله بيعطيج اجر :/
ولا كأني كلمته :/

روتين غير اعتيادي ! January 3, 2008

السلام عليكم ورحمة الله وبركاته !

ممم كلمة “روتين” اللي بالعنوان اقصد فيها روتين بشي غريب “او غير اعتيادي” ادي انه تناقض بس، دايما يستويلي
وانا استغرب منه ، دايا اقول لأ صدفه :/ والمشكله هالشي يستوي دايما
مثلا ، هذاك اليوم قاعد عالنت واربيعي من السعويه يا على بالي ، فجأه بعد خمس دقايق
تلفوني يرن واشوفه هو اللي متصل ! هالشي دايما يصير لي واقول صدفه

شي ثاني ، مثلا احد من الاهل يكون في بالي ، اشوفه اليوم الثاني ياي بيتنا او نفس اليوم :/
واليوم بعد! ما ادري ليش استاذنا اللي مدرسني من 7 سنين يا في بالي !
الا اشوفه اليوم في المسيد ! طبعا هو ما عرفني بس انا عرفته ! وسلمت عليه خخخخ
ممم ما ادري اذا هذا الشي عادي ولا طبيعي بس يستويلي بشكل مستمر جدا !